Presidenti amerikan Donald Trump i ka kërkuar presidentit izraelit t'i japë një falje të plotë kryeministrit izraelit Benjamin Netanyahu në gjyqin e tij për korrupsion që vazhdon ende. Në një letër të shpërndarë nga zëdhënësi i presidentit izraelit, Trump shkruante: "Me anë të kësaj letre ju bëj thirrje të falni plotësisht Benjamin Netanyahun, i cili ka qenë një Kryeministër i fuqishëm dhe vendimtar në kohë lufte, dhe tani po e udhëheq Izraelin drejt një kohe paqeje, që përfshin punën time të vazhdueshme me udhëheqësit kryesorë të Lindjes së Mesme për të shtuar shumë vende të tjera në Marrëveshjet e Abrahamit". Netanyahu përballet me akuza për mashtrim, ryshfet dhe shkelje të besimit në tre raste të ndara që filluan në mandatin e parë të Trumpit. Ai është deklaruar i pafajshëm dhe mbron pafajësinë e tij. Netanyahu aktualisht po dëshmon në gjykatë si pjesë e gjyqit. "Ndërsa unë respektoj absolutisht pavarësinë e Sistemit Izraelit të Drejtësisë dhe kërkesat e tij, besoj se 'rasti' kundër Bibit, i cili ka luftuar përkrah meje për një kohë të gjatë, përfshirë edhe kundër kundërshtarit shumë të ashpër të Izraelit, Iranit, është një ndjekje penale politike dhe e pajustifikuar", shkruante Trump në letër. Në një deklaratë, zyra e Herzog tha se ai e vlerëson shumë presidentin Trump dhe vlerëson "mbështetjen e tij të palëkundur për Izraelin, kontributin e tij të jashtëzakonshëm në kthimin e pengjeve, transformimin e Lindjes së Mesme dhe Gazës, si dhe ruajtjen e sigurisë së Izraelit". Por zyra e Herzog tha gjithashtu se "kushdo që kërkon falje duhet të paraqesë një kërkesë në përputhje me procedurat e përcaktuara". Netanyahu nuk ka paraqitur një kërkesë zyrtare për falje në gjyqin e tij që vazhdon.