Donald Trump është "në krye" të listës së frikshme të vrasjeve të Iranit, ka pohuar një ish-zyrtar i Shtëpisë së Bardhë. John Bolton, i cili shërbeu në administratën e parë të Trumpit si këshilltar për sigurinë kombëtare, paralajmëroi se Irani ka një "listë vrasjesh" në një intervistë për Sky Neës. "Mendoj se rrjeti terrorist i Iranit është me të vërtetë mjaft i gjerë në Evropë dhe në Shtetet e Bashkuara", tha Bolton duke pretenduar se një numër zyrtarësh të qeverisë amerikane janë shënjestruar në lidhje me vrasjen e komandantit të lartë ushtarak iranian Qasem Soleimani në vitin 2020. Soleimani, i cili u shpall terrorist nga Shtetet e Bashkuara, ishte një figurë shumë e fuqishme në regjimin iranian. Ai komandonte Forcën Quds, një degë e forcave të sigurisë së Iranit që është përgjegjëse për operacionet jashtë territorit iranian. Bolton pretendon se edhe vetë ai është në listën e zezë të Iranit, megjithëse bëri të qartë se Trump është objektivi numër një. "Presidenti Trump është në krye të listës së tyre", tha ai. Regjimi iranian do të shënjestronte objektivat e tij duke shfrytëzuar "bandat kriminale të Evropës Lindore dhe të tjerë", pretendoi më tej Bolton. Departamenti i drejtësisë në SHBA, lëshoi një urdhër arresti për shtetasin iranian Shahram Poursafi në vitin 2022 për dyshimin se kishte komplotuar vrasjen e Boltonit. "Unë nuk jam personi i vetëm përveç Trump," shtoi Bolton. "Ish-zyrtarë të tjerë të kabinetit janë shënjestra të Iranit. Kjo është vërtet e paprecedentë. Ne nuk po shënjestrohemi sepse jemi disidentë iranianë, por për shkak të asaj që kemi bërë duke kryer detyrën tonë zyrtare".