Këshilltarët e Presidentit të zgjedhur amerikan, Donald Trump, pranojnë tani se lufta në Ukrainë do të marrë muaj apo edhe më shumë për t'u mbyllur, një kthim ky me këmbë në tokë pas premtimit më të madh të tij për politikën e jashtme, atë të arritjes së një marrëveshjeje paqeje në ditën e parë në shtëpinë e bardhë. Dy bashkëpunëtorë të Trump, që kanë diskutuar luftën në Ukrainë me presidentin e zgjedhur, i thanë Reuters se shikonin një afat kohor prej muajsh për të zgjidhur konfliktin, duke përshkruar premtimin e ‘Ditës së Parë’ si një kombinim të rrëmujës së fushatës dhe mungesës së vlerësimit të plotë të konfliktit apo kohës që nevojitet për të krijuar një administratë të re. Këto vlerësime përputhen me komentet e të dërguarit të ardhshëm të Trumpit për Rusinë dhe Ukrainën, gjeneral-lejtnantit në pension Keith Kellogg, i cili tha në një intervistë me Fox Neës javën e kaluar se do të dëshironte të kishte një "zgjidhje" për luftën brenda 100 ditëve, shumë përtej afatit kohor origjinal të presidentit të zgjedhur. Megjithatë, edhe afati i zgjatur i Kellogg ishte "shumë shumë optimist", thotë John Herbst, një ish-ambasador i SHBA-së në Ukrainë. Para fitores së tij në zgjedhjet e 5 nëntorit, Trump deklaroi dhjetëra herë se do të kishte një marrëveshje midis Ukrainës dhe Rusisë në ditën e tij të parë në detyrë, nëse jo më parë. Në fund të tetorit, megjithatë, ai bëri një ndryshim delikat në retorikën e tij dhe filloi të thoshte se mund ta zgjidhte luftën "shumë shpejt". Që nga zgjedhjet, Trump është tërhequr akoma më shumë, shpesh duke thënë thjesht se ai do ta "zgjidhte" konfliktin, pa ofruar një afat kohor. Madje presidenti i zgjedhur ka thënë se përfundimi i luftës në Ukrainë do të jetë më i vështirë sesa arritja e një armëpushimi në Gaza.