Elon Musk tha vonë të enjten se do të marrë pjesë në tubimin e Donald Trump në Butler të Pensilvanisë më vonë këtë javë, një ngjarje që do të shënojë kthimin e ish-presidentit amerikan në qytetin ku ai i mbijetoi një atentati në korrik. "Unë do të jem atje për të mbështetur!" shkruante Musk nën një postim të Trump në platformën e mediave sociale X ku ish presidenti njoftonte se ai po kthehej te Butler të shtunën. Musk, CEO i Teslas dhe pronari i X, e quajti kandidatin republikan presidencial Donald Trump "të fortë" dhe e mbështeti atë zyrtarisht pasi i mbijetoi një atentati në Butler më 13 korrik, duke çimentuar zhvendosjen e tij drejt së djathtës. Tubimi i 5 tetorit do të mbahet në të njëjtin terren, ku Trump u gjakos në veshin e djathtë dhe një pjesëmarrës në tubim u vra pasi një person i armatosur hapi zjarr. Personi i armatosur, i identifikuar si një 20-vjeçar Thomas Crooks, u qëllua dhe u vra nga një snajper i Shërbimit Sekret. Në shtator, ish-presidenti i mbijetoi një tjetër tentative për atentat kur një person i armatosur qëndroi i pazbuluar, në pritje, për gati 12 orë, në një fushë golfi në një nga klubet e tij në Florida.