Presidenti amerikan Donald Trump dhe ai ukrainas Volodymyr Zelenski u përplasën sërish të mërkurën mbi përpjekjet për t'i dhënë fund luftës trevjeçare në Ukrainë, me liderin amerikan që qortoi Zelenskin për refuzimin e njohjes së okupimit rus të Krimesë. Zëvendësi i Trumpit, JD Vance tha se ishte koha që Rusia dhe Ukraina ose të bien dakord për një propozim paqeje të SHBA-së "përndryshe Shtetet e Bashkuara do të largohen nga ky proces", duke i bërë jehonë një paralajmërimi të Trumpit, javën e kaluar. Duke folur për gazetarët në Indi, Vance tha se propozimi kërkonte ngrirjen e linjave territoriale "në një nivel afër vendit ku janë sot" dhe një "zgjidhje diplomatike afatgjatë që shpresojmë se do të çojë në paqe afatgjatë". "E vetmja mënyrë për të ndaluar me të vërtetë vrasjet është që ushtritë të ulin armët, të ngrijnë luftën", tha ai. Një ish-zyrtar perëndimor i njohur me propozimin e SHBA tha se ai kërkon gjithashtu njohjen e aneksimit të Krimesë nga Rusia. Që nga marrja e detyrës në janar, Trump ka ndryshuar politikën e SHBA-së ndaj luftës në Ukrainë, duke i bërë presion Ukrainës që të pajtohet me një armëpushim, ndërsa zbuti presionin ndaj Rusisë, e cila filloi pushtimin e plotë të fqinjit të saj në 2022. Zelenski të martën përsëriti se Ukraina nuk do t'ia dorëzonte kurrë Krimenë Rusisë, e cila mori kontrollin e gadishullit në vitin 2014, në një veprim që u dënua ndërkombëtarisht. "Nuk ka asgjë për të folur këtu. Kjo është kundër kushtetutës sonë," tha ai. Trump, i cili debatoi me Zelenskin në një takim katastrofik të Zyrës Ovale në mars, e quajti këtë një deklaratë nxitëse që e bëri paqen më të vështirë për t'u arritur. Ai tha në një postim në rrjetet sociale se Krimea ishte e humbur vite më parë "dhe nuk është më as pikë diskutimi".