Presidenti amerikan Donald Trump është i bindur se Rusia do t'i japë fund luftës kundër Ukrainës. Ai sheh një "shans të mirë" për ta arritur këtë por nëse kjo përpjekje dështon, SHBA do të tërhiqet. As armëpushim, as lëshime dhe asnjë afat kohor detyrues: Biseda telefonike mes presidentëve të SHBA-së dhe Rusisë, Donald Trump dhe Vladimir Putin nuk solli rezultate, e megjithatë Donlad Trump e cilësoi më pas si sukses. "Është një gjakderdhje. Dhe unë besoj se ai dëshiron t'i japë fund," tha Trump, duke iu referuar homologut të tij Vladimir Putin. Lidhur me përpjekjet për t'i dhënë fund luftës, Trump tha në Shtëpinë e Bardhë: "Mendoj se kemi një shans të mirë për ta bërë këtë. Mendoj se Putini e dëshiron këtë." Trump tha se ai nuk do të kërkonte një zgjidhje paqeje nëse nuk do ishte i bindur për të. Trump tha se SHBA do që të vazhdojë përpjekjet e saj ndërmjetësuese për t'i dhënë fund luftës në Ukrainë. Presidenti ukrainas Volodymyr Zelensky gjithashtu dëshiron t'i japë fund luftës. Duhet të ketë më shumë qartësi brenda dy deri në katër javë, tha Trump, pa dhënë detaje të mëtejshme. Ka "ego të mëdha të përfshira”, vazhdoi Trump. Por nëse nuk ka përparim, "unë thjesht do të tërhiqem," tha ai, duke përsëritur paralajmërimin e tij se mund të braktisë përpjekjet për të sjellë paqen midis Rusisë dhe Ukrainës. "Kjo nuk është lufta ime”, tha Trump.