Presidenti amerikan Donald Trump tha se nuk mendon se Kina do të pushtojë Tajvanin, për shkak të forcës së ushtrisë amerikane dhe marrëdhënies së tij me Xi Jinping. Megjithatë, Trump tha se pret që çështja të jetë në axhendë kur të takohet me homologun e tij kinez, në margjinat e një konference ekonomike në Korenë e Jugut javën e ardhshme. I pyetur nëse Xi Jinping mund të përpiqet të pushtojë Tajvanin në gjashtë vitet e ardhshme, Trump u tha gazetarëve: "Mendoj se do të jemi mirë me Kinën. Kina nuk dëshiron ta bëjë këtë". Pa thënë nëse do të vendosej në mbrojtje të Tajvanit, ose jo, presidenti amerikan tha se Kina e di që SHBA-të "janë fuqia më e fortë ushtarake në botë aktualisht". SHBA historikisht ka ndjekur praktikën e paqartësisë strategjike ndaj Tajvanit, duke u përmbajtur nga deklarimi i drejtpërdrejtë nëse do ta mbronte apo jo kombin ishullor në rast të një sulmi.