Presidenti amerikan Donald Trump ka përsëritur thirrjen e tij për një marrëveshje paqeje në konfliktin në Gaza, megjithatë mbetet e paqartë se sa afër është një zgjidhje diplomatike. Kjo është hera e dytë këtë fundjavë që Trump ka bërë një apel për paqe përmes platformës së tij në mediat sociale, ndërkohë që situata në terren vazhdon të përkeqësohet. Të paktën 72 persona janë vrarë nga sulmet izraelite në të gjithë Rripin e Gazës gjatë orëve të fundit, sipas burimeve lokale. Bisedimet e paqes, të cilat ishin ndërprerë që nga marsi pas një raundi të ri dhune nga Izraeli, kanë vazhduar herë pas here por pa ndonjë sukses të dukshëm. Sipas burimeve palestineze, që nga fillimi i luftës në tetor të vitit 2023 janë vrarë mbi 56 mijë e 300 persona dhe më shumë se 132 mijë e 600 të tjerë janë plagosur. Konflikti nisi pas sulmeve të 7 tetorit nga Hamasi dhe grupet e tjera militante palestineze, të cilat lanë të vrarë rreth 1 mijë e 200 persona dhe sollën rrëmbimin e më shumë se 250 pengjeve në Gaza.