Presidenti amerikan, Donald Trump ka rikthyer sërish tonet kërcënuese për tarifa, duke paralajmëruar se çdo vend që vendos një taksë mbi shërbimet dixhitale për kompanitë amerikane do të goditet me një tarifë 100% për të gjitha mallrat. Ai tha në një postim në Truth Social se tarifa e re do të zëvendësojë çdo marrëveshje tregtare me SHBA-në. “Shumë vende evropiane kanë diskutuar zbatimin e menjëhershëm të një takse mbi shërbimet dixhitale për kompanitë amerikane. Disa nga këto vende janë gati ta bëjnë këtë. Ju lutem, lejoni që kjo deklaratë të shërbejë për të treguar se çdo vend që vendos një taksë të tillë do të përballet menjëherë me një TARIFË 100% për çdo mall të dërguar në Shtetet e Bashkuara të Amerikës. Kjo TARIFË do të zëvendësojë marrëveshjet tregtare të bëra me vendin, pavarësisht nëse janë zbatuar, nënshkruar apo jo. Përveç kësaj, TARIFA 100% do të vendoset menjëherë, nëse ato vazhdojnë. Faleminderit për vëmendjen tuaj ndaj kësaj çështjeje.” – shkruan presidenti amerikan, Donald Trump.