Presidenti amerikan Donald Trump tha se do ta godasë Iranin "shumë fort" nëse vriten njerëz mes protestave të gjera që kanë shpërthyer në vend kundër regjimit. Irani është zhytur në kaos ndërsa protestuesit e zemëruar e përshkallëzuan revoltën e tyre kundër sundimtarëve të linjës së ashpër, me pamje tronditëse që tregojnë vendin në flakë. Turmat kanë dalë në rrugë pavarësisht një shtypjeje brutale, ndërsa regjimi ndërpreu aksesin në internet. "Unë i kam njoftuar ata se nëse fillojnë të vrasin njerëz, gjë që kanë tendencë ta bëjnë gjatë trazirave, ne do t'i godasim shumë fort. Po e ndjekim situatën nga afër. Atyre u është thënë qartë se nëse e bëjnë këtë, do të duhet të përballen me ferrin", tha Trump. Protestat filluan pasi tregtarët mbyllën dyqanet në pazarin e famshëm të Teheranit më 28 dhjetor kur monedha e vendit, riali ra në nivele rekord. Që atëherë, trazirat kanë shpërthyer në të gjithë vendin, me demonstrata gjithnjë e më të mëdha që mbahen në cdo qytet. Protestat po e tronditin ajatollahun ali Khamenei, regjimi i të cilit tashmë është goditur nga vitet e sanksioneve, një krizë ekonomike në thellim dhe pasojat e luftës së qershorit me Izraelin.