Presidenti amerikan Donald Trump, u ka kërkuar të gjithë palëve të përfshira në përpjekjet për t'i dhënë fund luftës në Gaza të “lëvizin shpejt” ndërsa ndërmjetësit do të takohen në Egjipt të hënën për bisedime indirekte të paqes mes Hamasit dhe Izraelit. Bisedimet vijnë pasi Hamasi ra dakord për disa pjesë të një plani paqeje prej 20 pikash të SHBA-së, duke përfshirë lirimin e pengjeve dhe dorëzimin e qeverisjes së Gazës tek teknokratët palestinezë, por kërkon negociata për çështje të tjera. Përgjigja e grupit nuk përmendi kërkesat kryesore për çarmatimin e tij dhe mosluajtjen e një roli të ardhshëm në qeverisjen e Gazës. Duke shkruar në mediat sociale se bisedimet kishin qenë “shumë të suksesshme”, Trump tha: “Më është thënë se faza e parë duhet të përfundojë këtë javë dhe po u kërkoj të gjithëve të lëvizin shpejt.” Presidenti amerikan shtoi se “koha është thelbësore, përndryshe do të ketë gjakderdhje masive”. Duke folur me gazetarët më herët, Trump tha se mendonte se pengjet do të fillonin të liroheshin “shumë shpejt”. Kur u pyet për fleksibilitetin mbi planin e tij të paqes, Trump tha se "nuk ka nevojë për fleksibilitet sepse të gjithë kanë rënë dakord pak a shumë me të, por gjithmonë do të ketë disa ndryshime". "Është një marrëveshje e shkëlqyer për Izraelin, është një marrëveshje e shkëlqyer për të gjithë botën arabe, kështu që jemi shumë të lumtur për këtë", shtoi ai. Ndërkohë, sulmet ajrore izraelite vazhduan në Gaza, pavarësisht se Trump i kërkoi Izraelit të "ndalojë menjëherë bombardimet" të premten pasi Hamasi iu përgjigj planit të propozuar.