Presidentja e Komisionit Evropian, Ursula von der Leyen, propozoi të mërkurën që Kanadaja të bëhet "anëtarja e parë e asociuar" e bllokut, duke nxitur një kërcënim të ri për tarifa nga presidenti amerikan Donald Trump. Lëvizja synon të forcojë ekonomitë e tyre përballë tensioneve në rritje tregtare me Shtetet e Bashkuara. Por Trump tha të mërkurën se SHBA mund të vendosë "tarifa të rënda" ndaj Bashkimit Evropian nëse e konsideron çdo marrëveshje të re me Kanadanë si një "akt armiqësor". "Nëse qëllimi është i mirë, në rregull. Nëse qëllimi është i keq, ne do të vendosim tarifa shumë të rënda ndaj Evropës; kjo është një mundësi," u tha ai gazetarëve. Kanadaja aktualisht është e përfshirë në një luftë tregtare me SHBA-në, partnerin e saj më të madh tregtar, gjë që shton urgjencën e përpjekjeve për t'u afruar me Bashkimin Evropian. Trump gjithashtu ka bërë thirrje vazhdimisht që Kanadaja të bëhet shteti i 51-të i SHBA-së, një ide e refuzuar prerazi nga kryeministri kanadez Mark Carney. Ky i fundit ishte i ftuar në fjalimin e Von der Leyen-it mbi gjendjen e Unionit në Strasburg të Francës, ku ajo theksoi se "në këtë botë të re, ne duhet të rimendojmë urgjentisht partneritetet tona dhe të ndërtojmë koalicione globale për qëndrueshmërinë dhe demokracitë tona". "Me pak fjalë, ne duam ta çojmë marrëdhënien me Kanadanë në nivelin më të lartë të mundshëm," tha ajo. Ndërkohë, Carney është i prirur të nxisë një marrëdhënie shumë më të ngushtë me BE-në, duke deklaruar të dielën se Kanadaja po kërkonte një "aleancë unike me Bashkimin Evropian". Ai tërhoqi vëmendjen me një fjalim në Davos të Zvicrës, në fillim të këtij viti, ku theksoi nevojën që "fuqitë e mesme" të vepronin në koordinim mes tyre në mesin e një "thyerjeje në rendin botëror".