Presidenti i Shteteve të Bashkuara, Donald Trump, ka kërcënuar Afganistanin për bazën ajrore të Bagramit se nëse nuk ia kthen trupave amerikane gjëra të këqia do të ndodhin. Mesazhi për qeverinë talebane që më herët nuk ka pranuar të heq dorë nga kjo bazë ka qenë mëse i qartë nga kreu i Shtëpisë së Bardhë që kërkon ta rimarë pas tërheqjes së ushtrisë nga paraardhësi i tij ish-persidenti Joe Biden. Dy ditë më parë, Trump njoftoi se Uashingtoni synon ta rimarrë bazë e madhe ajrore në veri të Kabulit, e cila ishte nën kontrollin e Shteteve të Bashkuara deri në tërheqjen e papritur të ushtrisë amerikane në vitin 2021. “Nëse Afganistani nuk e kthen bazën ajrore të Bagramit tek ata që e ndërtuan, Shtetet e Bashkuara të Amerikës, gjëra të këqija do të ndodhin”, tha Trump mbrëmjen e 20 shtatorit në një postim në rrjetet sociale. Më vonë, duke folur për gazetarët në Shtëpinë e Bardhë, ai e përsëriti kërcënimin. “Ne po flasim tani me Afganistanin, dhe e duam atë [bazën] përsëri, dhe e duam shpejt, menjëherë. Dhe, nëse ata nuk e bëjnë – nëse ata nuk e bëjnë, do ta mësoni vetë çfarë do të bëj”, u tha ai gazetarëve. Talibanët - të goditur nga trazirat, fatkeqësitë natyrore, varfëria dhe sulmet terroriste - kanë tentuar t’i përmirësojnë lidhjet me bashkësinë ndërkombëtare, dhe Rusia mbetet i vetmi vend që deri tani ka vendosur marrëdhënie diplomatike me ta. “Po përpiqemi ta marrim përsëri sepse ata [liderët talebanë] kanë nevojë për gjëra nga ne", tha Trump në konferencën e përbashkët me kryeministrin britanik, Keir Starmer që zhvilloi dy ditë më parë duke lënë mundësinë se udhëheqësit talibanë po tentojnë të negociojnë me SHBA.