Presidenti Donald Trump ka paraqitur detaje të reja të planit të tij ambicioz për një sistem mbrojtës raketor të quajtur "Kupola e Artë" me vlerë shumë miliardë dollarë për të mbrojtur Shtetet e Bashkuara nga sulmet e huaja, duke thënë se duhet të përfundojë para se ai të largohet nga detyra. "Do ta përfundojmë brenda tre vjetësh," u tha Trump gazetarëve ndërsa detajonte planin në Zyrën Ovale të martën. "Pasi të ndërtohet plotësisht, Kupola e Artë do të jetë e aftë të kapë raketat edhe nëse ato lëshohen nga ana tjetër e botës." Kontraktorë të profilit të lartë të mbrojtjes dhe kompani teknologjike, përfshirë SpaceX të Elon Musk, tashmë po konkurrojnë për kontratën e ndërtimit të mburojës, duke i bërë propozime direkt Sekretarit të Mbrojtjes Pete Hegseth. Por ekspertët kanë shprehur gjithashtu skepticizëm në lidhje me afatin kohor dhe koston e paraqitur nga Shtëpia e Bardhë, apo edhe fizibilitetin e një projekti të tillë. Administrata amerikane ka mbetur e paqartë në lidhje me planet e saj për zhvillimin e mburojës raketore, e cila frymëzohet nga Iron Dome, ose kupola e hekurt e Izraelit. Ndërsa ende nuk është e qartë se si do të duket saktësisht e ashtuquajtura Kupola e Artë, ka dallime të konsiderueshme në fushëveprim dhe shkallë, me mburojën e Izraelit. Kupola e Hekurt mbron në mënyrë selektive zonat e populluara nga kërcënimet me rreze të shkurtër veprimi në një vend me madhësinë e Neë Jersey-t; Trump dëshiron një sistem mbrojtës nga raketat që vijnë nga hapësira dhe nga raketat e përparuara balistike dhe hipersonike, të aftë për të mbrojtur një vend rreth 450 herë më të madh se Izraeli. Projekti do të kushtojë rreth 175 miliardë dollarë, tha Trump, dhe do të drejtohet nga Gjenerali Michael A. Guetlein, zëvendësshef i operacioneve hapësinore në Forcën Hapësinore të Shteteve të Bashkuara. Trump tha se edhe kanadaja ka shprehur interes për tu përfshirë në projekt dhe për tu mbrojtur nga Kupola e Artë.