Teksa negociatorët nga Izraeli dhe Hamasi mbajtën bisedime indirekte në përvjetorin e dytë të luftës presidenti amerikan, Donald Trump, tha se ka “gjasa reale” që të arrihet një marrëveshje e paqes në Gaza. “Ne jemi afër që të arrijmë një marrëveshje në Lindjen e Mesme që do të sjellë paqe në Lindjen e Mesme”, tha Trump për gazetarët në Zyrën Ovale teksa u takua me kryeministrin kanadez, Mark Carney. Trump tha se negociatorët amerikanë janë përfshirë në bisedimet që po mbahen në Egjipt. “Ka gjasa reale që ne mund të bëjmë diçka. Mendoj se ekziston mundësia që ne të mund të kemi paqe në Lindjen e Mesme. Kjo madje shkon përtej situatës në Gazë. Ne duam lirimin e menjëhershëm të pengjeve. Ekipet tona janë atje dhe pothuajse çdo shtet në botë ka mbështetur planin”, tha Trump. Ndërkohë Shtëpia e Bardhë tha të hënën se i dërguari i posaçëm i Trumpit, Steve Ëitkoff, dhe dhëndëri i presidentit, Jared Kushner do të luajnë rol në këto bisedime.