Presidenti i Shteteve të Bashkuara, Donald Trump, ka tërhequr ftesën e Kanadasë për t’iu bashkuar nismës së tij, Bordi i Paqes, e cila synon zgjidhjen e konflikteve botërore. Ky vendim i Trumpit erdhi pas fjalimit të kryeministrit të Kanadasë, Mark Carney, në Forumin Ekonomik Botëror në Davos, ku ai i kritikoi hapur shtetet e fuqishme, duke thënë se ato po përdorin integrimin ekonomik si armë dhe tarifat si mjet trysnie. “Përmes kësaj letre ju njoftoj se Bordi i Paqes po e tërheq ftesën për ju në lidhje me anëtarësimin e Kanadasë në atë që do të jetë bordi më prestigjioz i udhëheqësve botërorë", shkroi Trump të enjten në një postim në Truth Social drejtuar Carneyt. Javën e kaluar, zyra e Carneyt kishte njoftuar se ai ishte ftuar në bord dhe se synonte ta pranonte ftesën. Carney mori duartrokitje të rralla në Davos pas fjalimit që mbajti, në të cilin u bëri thirrje kombeve të pranonin fundin e një rendi global të bazuar në rregulla. Kanadaja, e cila së fundmi ka nënshkruar një marrëveshje tregtare me Kinën, mund të tregojë se si “fuqitë e mesme” mund të veprojnë së bashku për të shmangur viktimizimin nga hegjemonia amerikane, shtoi ai. Trump u kundërpërgjigj duke thënë se Kanadaja “jeton falë Shteteve të Bashkuara” dhe u tha pjesëmarrësve në Davos se Carney duhet të jetë mirënjohës për bujarinë që SHBA-ja ka treguar deri tani. “Mbaje mend këtë, Mark, herën tjetër që bën deklaratat e tua,” shtoi ai, duke iu drejtuar direkt Carneyt. Tërheqja e ftesës për Kanadanë erdhi disa orë pasi Trump zyrtarisht themeloi bordin, i cili fillimisht ishte menduar të konsolidonte një armëpushim në Gazë. Anëtarëve të përhershëm iu kërkohet të ndihmojnë financimin e bordit me një pagesë prej 1 miliard dollarësh secili, sipas Trumpit. “Pasi ky bord të formohet plotësisht, ne mund të bëjmë praktikisht çfarë të duam”, tha Trump të enjten në Zvicër. “Dhe do ta bëjmë këtë në bashkëpunim me Kombet e Bashkuara”.