Gabimi i parë i Angela Merkelit me Donald Trump, thotë vetë ish kancelarja gjermane, ishte se e kishte trajtuar atë si njeri plotësisht normal. Në ekstraktet nga libri i saj prej më shumë se 700 faqesh, Freedom, i botuar nga e përjavshmja gjermane Die Zeit, ish-kancelarja gjermane thotë se fillimisht nuk e kishte kuptuar Trumpin gjatë takimit të tyre të parë në vitin 2017 në Zyrën Ovale, ku ai u përpoq ta poshtëronte duke refuzuar t’i shtrëngojë dorën para kamerave. "Në vend që të qëndroja stoike, i pëshpërita duke i thënë se duhet të shtrëngonim duart përsëri", shkruan ajo. “Sapo më dolën fjalët nga goja e kuptova. Si mund të mendoja që Trump nuk e dinte saktësisht se çfarë po bënte… Ai donte t'u jepte njerëzve diçka për të folur me sjelljen e tij, ndërsa unë kisha pretenduar se po bisedoja me dikë normal”.