Kompania private e ish-presidentit të Shteteve të Bashkuara Donald Trump e ka bërë Shërbimin Sekret të paguante për dhoma në pronat e tij me një çmim 40 herë më të lartë sesa tarifat e miratuara nga qeveria, përfshirë dy fatura për mbi 1100 dollarë nata për një dhomë, sipas dokumenteve të publikuara së fundmi nga një komision i kongresit amerikan. Shërbimi Sekret u faturua me më shumë se 800 dollarë për natë të paktën 11 herë kur agjentët qëndruan në Mar-a-Lago në Florida, në hotelin Trump në Uashington dhe prona të tjera, tha Komisioni i Dhomës së Përfaqësuesve për Mbikëqyrjen i udhëhequr nga demokratët. Komisioni vuri në dukje se ish-presidenti Trump bëri mbi 500 udhëtime në shtëpitë dhe hotelet e tij kur ishte president. Faturat “jashtëzakonisht të larta" sugjerojnë "fitime të financuara nga taksapaguesit për bizneset në vështirësi të ish-Presidentit Trump", shkruante kryetarja e komisionit Carolyn Maloney në një letër drejtuar Shërbimit Sekret, ku kërkonte më shumë informacion për këtë çështje. Shërbimi Sekret tha ndërkohë se e kishte marrë letrën dhe po e shqyrtonte atë.