Presidenti amerikan Donald Trump, ka paralajmëruar Nikolas Maduron të largohet menjëherë nga Venezuela nëse dëshiron të shpëtojë familjen e tij. Kjo vjen ndërsa Uashingtoni dhe Karakasi janë në prag të një lufte të plotë, me presidentin amerikan që urdhëroi mbylljen e hapësirës ajrore të vendit të Amerikës së Jugut. Trump konfirmoi se ka folur me presidentin Maduro në telefon, duke i ofruar atij, bashkëshortes Cilia Flores dhe djalit, një kalim të sigurt jashtë vendit, raporton Miami Herald. Në këmbim, Uashingtoni kërkoi që Maduro të japë dorëheqjen menjëherë dhe të largohet nga Venezuela, së bashku me ndihmësit e tij, për të lejuar rivendosjen e sundimit demokratik. Një burim tha se telefonata, të cilën Neë York Times raportoi se u zhvillua javën e kaluar, u pa si një përpjekje e fundit për të shmangur një konfrontim. Por kuptohet se të dy udhëheqësit nuk arritën të ulnin tensionet pasi Maduro refuzoi ultimatumin e Trumpit. Kur u pyet nëse kishte folur me Maduron, Trump tha: "Nuk dua të bëj komente për këtë por përgjigja është po. Nuk do të thoja se shkoi mirë apo keq, ishte vetëm një telefonatë". Të shtunën, Trump tha se hapësira ajrore mbi dhe përreth Venezuelës duhet të konsiderohet "e mbyllur në tërësi", por nuk dha detaje të mëtejshme.