Mediat amerikane kritike me Presidentin Donald Trump, duke cituar burime nga Departamenti i Shtetit shkruajnë se armëpushimi i vendosur mes Iranit dhe Izraelit nuk u arrit përmes bombave që goditën tre centralet bërthamore të Teheranit, por karrotës. Sipas tyre, SHBA ka arritur një marrëveshje të fshehtë me Iranin, ku zotohet që të financojë me 30 miliardë dollarë programin e tij bërthamor, me kusht që Uashingtoni të ketë akses dhe kontroll që ky program të jetë plotësisht civil. Në të njëjtat shkrime thuhet se përmes kësaj marrëveshjeje, SHBA shpreson që të largojë rusët nga programi bërthamor i Teheranit vetëm pak ditë pasi Presidenti rus, Vladimir Putin tha se 200 ekspertë rusë punojnë me kolegët e tyre iranianë për programin bërthamor të Teheranit. Vetë Donald Trump i cilësoi spekulime këto raportime. Përmes një postimi në rrjetet sociale, ai tha se lajmi është një mashtrim i ndyrë i përhapur nga njerëz të sëmurë.