Dega e ullirit që Donald Trump i ka ofruar Kim Jong Un-it të Koresë së Veriut në kurriz të një aleati të hershëm vjen në një moment vendimtar për lidhjet e sigurisë së SHBA-së në Azi, ndërsa partnerët nga Japonia në Indi rivlerësojnë se sa mund të mbështeten te Uashingtoni. Vendimi i papritur i presidentit amerikan për të reduktuar stërvitjet ushtarake me Korenë e Jugut javën e kaluar, të cilat ai i përshkroi si armiqësore ndaj Phenianit, ka shtuar frikën se paparashikueshmëria e Trump-it mund të tendosë aleancat që kanë ruajtur prej kohësh paqen në rajon, thanë për Reuters zyrtarë qeveritarë dhe ekspertë të sigurisë. Japonia shqetësohet se edhe ajo mund ta gjejë veten në shënjestrën e Trump-it ndërsa nis negociata të vështira për sigurinë; Tajvani po e ndjek me kujdes një samit të ardhshëm mes Trumpit dhe Presidentit Kinez Xi Jinping; dhe India po bëhet gjithnjë e më pak e sigurt për vendin e saj në llogaritjet strategjike të Uashingtonit. "Vendimi me siguri do të nxisë dyshime në rritje në rajon në lidhje me angazhimet e sigurisë së SHBA-së", thotë Jeremy Chan, një analist i lartë në grupin e konsulencës për rrezikun politik Eurasia Group dhe ish-diplomat amerikan në Japoni dhe Kinë.