Ndërsa akademikët po përgatiten për shpalljen e çmimeve Nobel javën e ardhshme, organi që ndan çmimet paralajmëron se liria akademike është nën kërcënim në SHBA dhe vende të tjera të botës, me ndërhyrjet politike që rrezikojnë efekte negative afatgjata. Presidenti amerikan Donald Trump, ka prezantuar një sërë masash në mandatin e tij të dytë që kritikët argumentojnë se do të pengojnë arsimin dhe kërkimin shkencor. Ylva Engstrom, nënkryetare e Akademisë Mbretërore Suedeze të Shkencave, e cila ndan çmimet për kimi, fizikë dhe ekonomi, tha se ndryshimet e administratës Trump ishin të pamatura. "Mendoj se si në plan afat të shkurtër ashtu edhe në plan afatgjatë, mund të ketë efekte shkatërruese," i tha ajo Reuters në një intervistë. "Liria akademike ... është një nga shtyllat e sistemit demokratik". Administrata Trump mohon akuzat se po mbyt lirinë akademike, duke thënë se masat e saj do të ulin shpërdorimin dhe do të promovojnë inovacionin shkencor në SHBA. Engstrom, e cila është gjithashtu anëtare e bordit të Federatës Evropiane të Akademive të Shkencave, nuk është vetë në asnjë nga tre komitetet që do të japin çmimet për kimi, fizikë apo ekonomi. Çmimet Nobel, të konsideruara nga shumë si çmimet më prestigjioze të shkencës në botë, do të shpallen nga java e ardhshme, duke filluar me çmimin për mjekësi ose fiziologji të hënën dhe duke përfunduar me zbulimin e fituesve në ekonomi një javë më vonë. Çmimet u krijuan nga shpikësi i pasur suedez i dinamitit Alfred Nobel dhe jepen gjithashtu për arritje të shquara në fizikë, kimi, letërsi dhe paqe. Trump ka thënë disa herë se e meriton Çmimin Nobel për Paqen, megjithëse ekspertët thonë se shanset e tij janë shumë të pakta.