Presidenti rus Vladimir Putin dhe presidenti i SHBA Donald Trump mund të takohen brenda këtij muaji, megjithëse një takim ballë për ballë do të marrë kohë për t'u përgatitur, tha të mërkurën zëdhënësi i Kremlinit Dmitry Peskov, sipas agjencive ruse të lajmeve. Peskov tha se bisedimet SHBA-Rusi të mbajtura të martën në Riad ishin një "hap shumë, shumë i rëndësishëm" drejt arritjes së një zgjidhjeje për luftën në Ukrainë, që po i afrohet rrumbullakosjes së vitit të tretë të saj. “Me qëllim që të ndërmerren, në mënyrë figurative, masat e ringjalljes, diplomatët tani do të fillojnë të punojnë nën dritën e marrëveshjes që ministri i Jashtëm rus Sergei Lavrov arriti dje me Sekretarin amerikan të Shtetit Marko Rubio”, citohet të ketë thënë Peskov nga media shtetërore. "Por ky është hapi i parë... Natyrisht, është e pamundur të rregullosh gjithçka brenda një dite apo një jave. Ka një rrugë të gjatë përpara", shtoi ai. Bisedimet në Riad ishin hera e parë që zyrtarët amerikanë dhe rusë takoheshin për të diskutuar mënyrat për të ndalur konfliktin më vdekjeprurës në Evropë që nga Lufta e Dytë Botërore. Asnjë zyrtar ukrainas apo evropian nuk u ftua në takim. Kievi ka thënë se nuk do të pranojë asnjë marrëveshje të imponuar pa pëlqimin e tij.