Duke qëndruar përpara kantierit të ndërtimit të sallës së vallëzimit në Shtëpinë e Bardhë, Presidenti amerikan Donald Trump iu drejtua amerikanëve që përballen me rritjen e çmimit të karburantit, ndërsa përpiqej të justifikonte koston e një projekti që kritikët e quajnë një përpjekje të kotë. "Kjo është asgjë", tha ai të martën në një referencë të dukshme për dëmin ekonomik që i ëhstë shkaktuar SHBA-së nga lufta me Iranin. "Vlerësoj të gjithë ata që e duruan për pak kohë. Nuk do të zgjasë shumë", shtoi ai. Ky moment kristalizoi shqetësimet midis disa anëtarëve të Partisë së tij Republikane, të cilët druajnë se fokusi i presidentit miliarder në sallën e vallëzimit duket i pandjeshëm, ndërsa amerikanët përpiqen të mbushin rezervuarët e tyre të benzinës përpara zgjedhjeve të mesit të mandatit të nëntorit. Një shqyrtim i komenteve publike të Trump nga Reuters tregon se ai e ka përmendur sallën e vallëzimit të paktën 40 herë këtë vit, përfshirë nëntë herë vetëm këtë muaj. Ai është i prirur të flasë për sallën e vallëzimit në çdo moment, qoftë kur bisedon me gazetarët në Air Force One, kur flet me mysafirët në Zyrën Ovale apo kur bën postime në platformën e tij Truth Social.