Donald Trump pretendon se ka marrë miratimin e vendeve myslimane të Lindjes së Mesme për të ndërhyrë me trupa në Rripin e Gazës në rast se Hamasi nuk respekton armëpushimin e ndërmjetësuar prej tij me Izraelin. Përmes një postimi në Truth Social, Presidenti amerikan paralajmëron Hamasin se kjo ndërhyrje do të zhdukë njëherë e përgjithmonë organizatën, që SHBA e konsideron terroriste. “Shumë prej aleatëve tanë të mëdhenj në Lindjen e Mesme më informuan se e mirëpresin propozimin për të ndërhyrë me një forcë të madhe ushtarake në Gaza për të zhdukur Hamasin nëse Hamasi vazhdon të sillet keq”, shkruan Trump. Por, Presidenti amerikan thotë se koha për një ndërhyrje të tillë nuk ka ardhur ende dhe se ka shpresë që Hamasi do të bëjë atë që është e drejtë. Në postimin e tij, Trump nuk citon asnjë prej udhëheqësve të vendeve të Lindjes së Mesme, ndërsa nuk ka një reagim zyrtar as nga Katari, as nga Egjipti, dy vendet kryesore që ndërmjetësuan armëpushimin e arritur mes Hamas dhe Izraelit.