SpaceX e Elon Musk dhe dy partnerë të tij janë shfaqur si kandidatë kryesorë për të ndërtuar një pjesë thelbësore të mburojës së mbrojtjes raketore "Golden Dome" të Presidentit Donald Trump. Kompania e raketave dhe satelitëve të Musk është në partneritet me prodhuesin e softuerëve Palantir dhe prodhuesin e dronëve Anduril në një përpjekje për të ndërtuar pjesë kyçe të Golden Dome, thanë disa burime për agjencinë e lajmeve Reuters, cka ka tërhequr interes të konsiderueshëm mes sektorit të teknologjisë së startupeve të mbrojtjes. Në urdhrin e tij ekzekutiv të 27 janarit, Trump përmendi një sulm të mundshëm raketor si "kërcënimin më katastrofik me të cilin përballet Shtetet e Bashkuara". Të tre kompanitë e përmendura janë themeluar nga sipërmarrës që kanë qenë mbështetës kryesorë politikë të Trumpit. Musk ka dhuruar më shumë se një çerek miliardë dollarë për të ndihmuar në zgjedhjen e Trump, dhe tani shërben si këshilltar i posaçëm i presidentit që punon për të shkurtuar shpenzimet qeveritare përmes Departamentit të tij të Efikasitetit të Qeverisë. Pavarësisht sinjaleve pozitive të Pentagonit për SpaceX, disa burime theksuan se procesi i vendimit për Kupolën e Artë të Trumpit është në fazat e hershme. Struktura përfundimtare dhe kush zgjidhet për të punuar për ndërtimin e saj mund të ndryshojnëë në mënyrë dramatike në muajt e ardhshëm. Të tre kompanitë janë takuar me zyrtarë të lartë në administratën Trump dhe Pentagon javët e fundit për të paraqitur planet e tyre për ndërtimin dhe lëshimin e deri 1 mijë satelitëve që do të rrethojnë globin dhe do të gjurmojnë raketat. Një flotë e veçantë prej 200 satelitësh, të armatosur me raketa ose lazer do të rrëzonte raketat e armikut, thanë tre nga burimet. Grupi SpaceX nuk pritet të përfshihet në armatimin e satelitëve, thanë këto burime.