Presidenti amerikan, Donald Trump tha se nuk ishte “100% i sigurt” se nuk mund të kandidojë edhe për një mandat të tretë si president. “Kam mbledhur shumë para për garën e ardhshme, që supozoj se nuk mund t'i përdor për veten time, por nuk jam 100% i sigurt,” tha Trump në darkën e Konferencës së Anëtarëve Republikanë të Dhomës së Përfaqësuesve që u mbajt në Doral, të Floridas. Ai pati një moment pasigurie, duke pyetur Kryetarin e Dhomës së Përfaqësuesve, Mike Johnson, “Nuk jam i sigurt, a më lejohet të kandidoj sërish, Mike? Më mirë të mos ju përfshij në këtë." Kjo nuk është hera e parë që Trump ka lënë të kuptohet për mundësinë e kërkimit të tre mandateve në detyrë. Në një paraqitje të dielën e kaluar në Las Vegas, Nevada, ai tha: "Do të jetë nderi më i madh i jetës sime të shërbej jo një herë, por dy ose tre herë", duke nxitur më tej spekulimet për planet e tij të ardhshme politike. Më herët, Republikani Andy Ogles nga Tenesi ka folur për ndryshimin e Kushtetutës së SHBA-së për të lejuar Trumpin që të kandidojë për një mandat të tretë. Por është e vështirë të ndryshohet Kushtetuta, e cila nuk është ndryshuar që nga ratifikimi i Amendamentit të 27-të në vitin 1992. Propozimi zyrtar i një amendamenti të kushtetutës kërkon ose dy të tretat e votave në Dhomën e Përfaqësuesve dhe Senat, në një kohë kur Republikanët nuk kanë vende të mjaftueshme për të kaluar atë, ose një konvente kushtetuese, e cila nuk është mbajtur që nga shekulli i 18-të. Më pas, për të ratifikuar një amendament të ri, tre të katërtat e legjislaturave shtetërore, pra 38 shtete amerikane, duhet ta miratojnë atë.