Trupat e Gardës Kombëtare të Kalifornisë u vendosën në rrugët e Los Angeles të dielën për të ndihmuar në shuarjen e ditës së tretë të protestave kundër zbatimit të ligjit për imigracionin nga Presidenti Donald Trump, një hap që guvernatori demokrat i shtetit, Gavin Neësom, e quajti të paligjshëm. Trupat e Gardës Kombëtare u vendosën në mbrojtjen e ndërtesave të qeverisë federale, ndërsa policia dhe protestuesit u përleshën në demonstrata të ndara kundër operacioneve federale të imigracionit në Los Angeles. Policia e Los Angelesit shpalli disa tubime si "mbledhje të paligjshme", duke akuzuar disa protestues se hodhën gurë, shishe dhe sende të tjera drejt policisë. Imazhet video treguan disa makina në flakë në një rrugë në qendër të qytetit të dielën në mbrëmje. Oficerët e policisë së Los Angeles mbi kuaj u përpoqën të kontrollonin turmat. Demonstruesit thërrisnin "Turp për ju!" dhe disa dukeshin se hidhnin objekte kundër policisë. Një grup bllokoi Autostradën 101, një rrugë kryesore në qendër të qytetit. Grupe protestuesish, shumë prej të cilëve mbanin flamuj meksikanë dhe pankarta që denonconin autoritetet amerikane të imigracionit, u mblodhën në pika të ndryshme rreth qytetit. Guvernatori i Kalifornisë, Gavin Neësom, tha se i kërkoi administratës Trump të tërhiqte urdhrin për të vendosur 2,000 trupa të Gardës Kombëtare në qarkun e Los Angeles, duke e quajtur atë të paligjshëm. Në një intervistë, Neësom tha se planifikonte të padiste administratën për dislokimin e gardës, duke shtuar se Trump "ka krijuar kushtet" për protesta. Neësom akuzoi Trump se po përpiqet të prodhojë një krizë dhe të shkelë sovranitetin shtetëror të Kalifornisë. "Këto janë akte të një diktatori, jo të një presidenti", shkroi ai në një postim në X.