Kandidati republikan për president të SHBA-së, Donald Trump dhe zëvendëspresidentja demokrate, Kamala Harris, do të përballen në debatin e tyre të parë dhe ndoshta të vetëm, të martën, një përplasje që mund të jetë thelbësore në betejën e tyre për Shtëpinë e Bardhë. Debati i organizuar nga ABC Neës në orën 21:00, sipas orës lokale, zhvillohet vetëm tetë javë përpara zgjedhjeve të 5 nëntorit, me të dy kandidatët të përfshirë në një garë të ngushtë që ende mund të zhvendoset lehtësisht në të dyja drejtimet. Votimi i parakohshëm do të nisë në disa shtete vetëm disa ditë pas debatit. Debati është veçanërisht i rëndësishëm për Harris, me sondazhet që tregojnë se më shumë se një e katërta e votuesve të mundshëm mendojnë se nuk dinë ende mjaftueshëm për të, në kontrast me Trumpin tashmë të njohur mirë. Debati në televizion kombëtar i ofron gjithashtu Harris, një ish-prokurore, një shans për të ngritur çështjen e saj kundër Trump, në lidhje me shkeljet e kryera prej tij, trazirat e 6 janarit 2021 në Kapitol Hill si edhe pretendimet e pabaza të përsëritura prej tij rregullisht. Do të jetë kjo hera e parë që të dy kandidatët përballen me njëri tjetrin ndërkohë që debati pason sulme personale të Trumpit, ndaj Harrisit, që zgjasin prej javësh.