SHBA ka ndërmarrë një valë “vendimtare dhe të fuqishme” sulmesh ajrore ndaj rebelëve Houthi në Jemen, tha presidenti Donald Trump, duke përmendur si arsye sulmet e grupit të armatosur ndaj anijeve në Detin e Kuq. “Të financuar nga Irani, banditët Houthi kanë lëshuar raketa mbi avionët dhe anijet amerikane dhe kanë vënë në shënjestër trupat dhe aleatët tanë”, shkroi Trump në platformën e tij Social Truth, duke shtuar se “pirateria, dhuna dhe terrorizmi” i tyre kishin kushtuar me “miliarda dollarë” dhe kishin vënë jetë njerëzish në rrezik. Ministria e shëndetësisë e drejtuar nga Houthit tha se të paktën 31 njerëz u vranë dhe 101 të tjerë u plagosën në sulme. Grupi, i cili filloi të shënjestrojë anijet tregtare në përgjigje të luftës Izrael-Hamas në Gaza, tha se forcat e tij do t'i përgjigjen sulmeve të SHBA. Houthi-t raportuan një seri shpërthimesh të shtunën në mbrëmje në Sanaa dhe në provincën veriore të Saadas, bastioni i rebelëve në kufirin me Arabinë Saudite. Grupi rebel i mbështetur nga Irani, i cili e konsideron Izraelin armikun e tij, kontrollon Sanaan dhe veriperëndimin e Jemenit, por nuk njihet ndërkombëtarisht. Në një deklaratë për shtyp, Houthit fajësuan SHBA-në dhe Britaninë e Madhe për agresionin mbi zonat e banuara në kryeqytetin e Jemenit, Sanaa. Mbretëria e Bashkuar nuk mori pjesë në sulmet e SHBA-së të së shtunës kundër objektivave Houthi, por ofroi mbështetje rutinë për furnizimin me karburant për SHBA-në. Ndërkohë, trump paralajmëroi se sulmet e Huthit nuk do të tolerohen dhe shtoi se do të përdoret forcë dërrmuese vdekjeprurëse deri sa të arrihet objektivi i SHBA-së.