Presidenti amerikan Donald Trump dhe presidenti turk Rexhep Tajip Erdogan tentuan fshehurazi të ndërmjetësonin një takim të nivelit të lartë mes zyrtarëve amerikanë dhe iranianë këtë javë në Stamboll, në përpjekje për të ulur tensionet e rritura mes Izraelit dhe Iranit. Sipas burimeve të cituara nga Axios, përpjekja e ndërmarrë me nismën e Erdoganit nuk u realizua, pasi Udhëheqësi Suprem i Iranit, Ali Khamenei, nuk dha miratimin e tij për shkak të frikës për sigurinë personale. Donald Trump ishte i gatshëm të merrte pjesë vetë nëse do të kishte qenë e nevojshme për realizimin e bisedimeve. Ndërkohë, situata në terren është përshkallëzuar ndjeshëm. Forcat Ajrore Izraelite kanë ndërmarrë tri valë sulmesh në Iranin qendror që nga mesnata, duke goditur gjithsej 45 objektiva me mbi 230 bomba. Objektivat përfshinin radarë, baza detare, qendra komande dhe lëshues raketash, disa prej të cilëve ishin braktisur në rrugë nga forcat iraniane. Dronët izraelitë kanë shkatërruar një numër të madh sistemesh raketore gjatë natës.