Presidenti i SHBA-së, Donald Trump, thotë se dërgoi Gardën Kombëtare dhe Marinsat për të “çliruar” Los Angelesin nga dhuna e protestuesve, por disa banorë të Little Tokyo, një lagje e goditur më rëndë nga trazirat thonë “jo faleminderit” Z. President. Dhjetëra njerëzish që jetojnë, punojnë ose frekuentojnë lagjen, ku dëgjohet të flitet japonisht po aq shpesh sa anglishtja në dyqane dhe restorante, i thanë të martën Reuters se përdorimi i ushtrisë nga Trump po ndezte protestat kundër bastisjeve të fundit të imigracionit në Los Angeles. “Dërgimi i Gardës Kombëtare dhe Marinsave nga presidenti vetëm sa i ka përkeqësuar gjërat, i ka bërë protestuesit të çmenden”, thotë Sulieti Havili, e cila jeton aty pranë. “Ata nuk po bëjnë asgjë për të mbrojtur këtë komunitet.” Sipas saj, është e qartë se dërgimi i mijëra trupave ushtarake nga Trumpi kishte "nxjerë në pah më të keqen tek protestuesit" dhe vetëm sa kishte rënduar situatën. Administrata Trump thotë se operacionet e saj të imigracionit po arrestojnë kriminelë de facto për mungesë dokumentesh për qëndrim në Shtetet e Bashkuara. Guvernatori i Kalifornisë, Gavin Neësom, ka thënë se përdorimi i personelit ushtarak për të shuar protestat kishte "cuar në një situatë shpërthyese" dhe paralajmëroi se "demokracia është nën sulm". Kryetarja e bashkisë së Los Angeles, Karen Bass, tha se përdorimi i trupave nga Trump ishte një përpjekje e qëllimshme për të krijuar "kaos". Administrata Trump i hedh poshtë fuqimisht akuzat dhe thotë se veprimet e tij ishin të nevojshme përballë pamundësisë së udhëheqësve lokalë dhe shtetërorë për ta vënë situatën nën kontroll.