Autoritetet amerikane po hetojnë një kompani në Tenesi që dyshohet se ka marrë dhjetë milionë dollarë nga televizioni shtetëror Russia Today për të "krijuar dhe shpërndarë përmbajtje me lajme të fabrikuara të qeverisë ruse për audiencën amerikane". Paratë thuhet se janë përdorur për të prodhuar video që promovonin kryesisht narrativa të krahut të djathtë mbi tema të tilla si emigracioni, problemet gjinore dhe ekonomia përpara zgjedhjeve në SHBA në nëntor 2024. Këto video më pas u shpërndanë në mediat sociale nga disa influencues të krahut të djathtë që punonin për kompaninë në Tenesi, gjoja pa e ditur që videot ishin bërë me përfshirjen ruse. Pikëpamjet e shprehura në video ishin "shpesh në përputhje me interesin e qeverisë ruse për rritjen e përçarjeve brenda Shteteve të Bashkuara", thuhet në aktakuzë. Qëllimi është "që SHBA të dobësohet në përballjen me interesat ruse, për shembull në luftën në Ukrainë." Rasti ofron vetëm një pasqyrë të vogël se si me gjasë vepron Rusia për të ndikuar në zgjedhje, ndonëse vetë Moska rregullisht mohon çdo akuzë për ndërhyrje në zgjedhjet e vendeve të tjera.