Shtetet e Bashkuara kanë nisur zhvendosjen e bombarduesve strategjikë B-2 në ishullin e Guamit, një territor amerikan në Paqësorin perëndimor, kanë bërë të ditur për agjencinë Reuters dy zyrtarë amerikanë, të cilët kërkuan të mbeten anonimë. Ky zhvillim ndodh në një moment kritik, teksa Presidenti Donald Trump po shqyrton mundësinë e përfshirjes së SHBA-së në një fushatë të mundshme ushtarake izraelite kundër Iranit, pas rritjes së tensioneve në Lindjen e Mesme. Megjithëse nuk është konfirmuar nëse kjo zhvendosje e bombarduesve lidhet drejtpërdrejt me përshkallëzimin e situatës midis Izraelit dhe Iranit, ajo përkon me një periudhë të rritjes së vigjilencës strategjike në rajon. Sipas burimeve, deri më tani nuk janë lëshuar urdhra për dislokim përtej Guamit, dhe numri i saktë i bombarduesve të përfshirë në këtë operacion nuk është bërë publik. B-2 Spirit, një nga mjetet më të avancuara të arsenalit ajror amerikan, ka kapacitetin për të transportuar raketën gjigante GBU-57, e njohur ndryshe si “bomba shkatërruese e bunkerëve”. Kjo armë është e krijuar për të goditur objekte të thella nën tokë, siç janë instalimet bërthamore iraniane në Fordoë dhe objektiva të ngjashëm. Zyrtarët nuk pranuan të jepnin detaje shtesë mbi qëllimet e operacionit, ndërsa Departamenti amerikan i Mbrojtjes nuk ka komentuar ende mbi këtë. Lëvizja e bombarduesve shihet si një sinjal i mundshëm për gatishmëri ushtarake, nëse situata në Lindjen e Mesme përshkallëzohet më tej.