Një aksident i rëndë tronditi Tiranën mbrëmjen e 15 Majit, ku një automjet tip Benz humbi kontrollin duke shkaktuar dëme të konsiderueshme. Ngjarja ndodhi rreth orës 21:00, në afërsi të shkollës ‘Vasil Shanto’në Tiranë. Mësohet se drejtuesja e ‘Benzit’ Flutura Zaimi, 49 vjeç humbi kontrollin e automjetit dhe u përplas me motorin e parkuar anës rrugës. Shkak dyshohet të ketë qenë edhe shpejtësia e drejtimit të autmjetit megjithatë unifomat blu po punojnë për zbardhjen e plotë të rrethanave të ngjarjes. Nga përplasja u shkatërrua plotësisht stacioni i autobuzave, ndërkohë automjeti në pronësi të shtetases Flutura Zaimi përfundoi brenda ambjenteve të një lokali. Krahas dëmeve materiale, aksidenti automobilistik dëmtoi edhe 3 shtetas. Këmbësorët u dërguan me urgjencë në spital, ku ndodhen nën kujdesin mjekësor. Burimet bëjnë me dije se janë jashtë rrezikut për jetën. Autoritetet policore kanë arrestuar në flagrancë drejtuesen e mjetit tip Benz, Flutura Zaimi teksa materialet i kaluan Prokurorisë pranë Gjykatës së Shkallës së Parë Tiranë, për veprime të metejshme.