Policia e Britaninë e Madhe arrestoi dy të dyshuar pas një sulmi masiv me thikë në një tren që shkonte në Londër të shtunën vonë, i cili la 10 persona në spital, nëntë prej të cilëve me "lëndime kërcënuese për jetën". Policia rrethoi një stacion hekurudhor në qytetin lindor rural të Huntingdonit, në Cambridgeshire, pasi u dha alarmi për sulmin dhe treni u ndal atje. "Dhjetë persona janë dërguar në spital pas një sulmi të shumëfishtë me thikë në një tren në Cambridgeshire. Nëntë prej tyre besohet se kanë pësuar lëndime kërcënuese për jetën", tha Policia në X, duke shtuar se njësitë kundër terrorizmit po mbështesin hetimin. Policia konfirmoi se treni po udhëtonte nga Doncaster në verilindje drejt Stacionit King's Cross të Londrës, një rrugë e ngarkuar, e mbushur me udhëtarë. Një dëshmitar tregoi se pa një burrë me një thikë të madhe dhe i tha gazetës The Times se kishte "gjak kudo" ndërsa njerëzit fshiheshin ku të mundnin. Kryeministri Keir Starmer tha se incidenti "i tmerrshëm" ishte "thellësisht shqetësues". "Mendimet e mia janë me të gjithë ata që janë prekur, dhe falënderimet e mia shkojnë për shërbimet e emergjencës për reagimin e tyre", tha Starmer në një deklaratë në X. "Kushdo në zonë duhet të ndjekë këshillat e policisë", shtoi Starmer, ndërsa ministrja e tij e brendshme Shabana Mahmood konfirmoi se dy persona ishin arrestuar.