Dyfishohet dhuna në familje në Shqipëri. Deri në muajin nëntor janë shënuar rreth 4200 denoncime në komisariatet e policisë së shtetit, nga viktimat e dhunës brenda katër mureve të shtëpisë, të cilat vijnë kryesisht nga gratë dhe vajzat. Shifrat krahas përmasave të fenomenit, tregojnë edhe një shtim të ndërgjegjësimit për adresimin e dhunës në familje pranë insitucioneve ligjzbatuese. Sipas të dhënave të Policisë së Shtetit, për 2800 nga këto raste viktima e dhunës është pajisur me urdhër mbrojtje. Ndërkohë pjesa tjetër është tërhequr nga kallëzimi në polici dhe situata është zgjidhur me pajtim. Gjithashtu nuk kanë munguar episodet kur denoncimi nuk ka plotësuar kushtet për t’u pajisur me urdhër mbrojtje. Në një krahasim me të dhënat e INSTAT për vitin 2022, evidentohet tendencë rritje të dhunës në familje. Në total janë raportuar në polici 1887 raste për veprën penale ‘dhunë në familje’ në vitin 2022, nga të cilat jan regjistruar 1453 procedimet penale, shifër që ka ardhur gradualisht në rritje që prej vitit 2018, kur në total në Drejtorinë e Përgjithshme të Policisë u regjistruan 1374 raste të dhunës në familje.