Prokuroria e Korçës ka përfunduar hetimet dhe ka dërguar për gjykim dosjen voluminoze për vrasjen tronditëse të 15-vjeçarit E.Xh. në fshatin Pirg, ngjarje e ndodhur në gusht të vitit 2025. Sipas organit të akuzës, në bankën e të akuzuarve do të ulet autori i mitur E.G., i cili akuzohet për vrasje në rrethana cilësuese, por edhe familjarët e tij që tentuan të fshehin krimin. Hetimet e mbështetura në pamjet filmike të lokalit ku ndodhi ngjarja, vërtetuan se pas një konflikti fizik, i mituri E.G. e ka ndjekur bashkëmoshatarin e tij mes tavolinave të verandës dhe e ka goditur me thikë në zonën e kraharorit, plagë e cila rezultoi fatale pavarësisht ndihmës mjekësore. Pozita e familjarëve rëndohet ndjeshëm, pasi rezulton se babai i autorit, shtetasi E.G., në bashkëpunim me vëllanë e tij R.G. dhe shtetasin F.Ç., kanë ndërmarrë veprime aktive për të penguar zbulimin e së vërtetës dhe për të devijuar hetimet. Një nga detajet më të rënda të dosjes tregon se xhaxhai i autorit, R.G., ka marrë mjetin e krimit dhe e ka larë për të zhdukur gjurmët e gjakut, duke bërë që thika të mos sekuestrohej dot në vendngjarje. Për këto veprime, Prokuroria kërkon dënimin e të miturit për vrasje dhe drejtim të parregullt të automjetit, ndërsa babai E.G., xhaxhai R.G. dhe shtetasi F.Ç. do të përballen me akuzat për veprime që pengojnë zbulimin e së vërtetës, moskallëzim krimi dhe përkrahje të autorit.