Pas një kundërofensive të dështuar në 2023, Ukraina në gusht nisi një inkursion të befasishëm në rajonin e Kurskut të Rusisë. Një nga qëllimet e ofensivës, pushtimi më I madh nga një ushtri e huaj në tokën ruse që nga Lufta e Dytë Botërore, ishte të devijonte forcat e Moskës nga luftimet në Ukrainën lindore. Megjithatë, përpjekja duket se dështoi. Rusia është përgjigjur me sulme vdekjeprurëse dhe trupat e Kievit nuk kanë mundur të frenojnë përparimet e qëndrueshme nga forcat ruse, veçanërisht në rajonin lindor të Donetskut. E ndërkohë, në ndihmë të Putinit ka ardhur edhe Kim Jong un, I cili ka dërguar në front mijëra ushtarë të Koresë së Veriut. Në nëntor, Ukraina përdori për herë të parë raketa me rreze të gjatë veprimi të furnizuara nga Perëndimi kundër Rusisë, pasi mori lejen e SHBA-së dhe Britanisë. Rusia u përgjigj duke goditur Ukrainën me një raketë balistike ndërkontinentale pa një kokë bërthamore, e duke u zotuar se do të vazhdojë sulmet e tilla nëse Kievi përdor armët perëndimore mbi tokë ruse. Putini madje kërcënoi se do të sulmojë vendet që ofrojnë armë për ukrainasit, duke përdorur edhe kartën e preferuar të tij, atë të kërcënimit me armë bërthamore.