Gjykata e Tiranës ka liruar nga qelia dy prej tre personave që u arrestuan pak ditë më parë për vendosjen e tritolit në një restorant në Kamëz. Ish efektivi i forcave Operacionale Jeton Lami është liruar nga qelia, pasi gjykata zbuti masën e sigurisë ndaj tij nga “arrest në burg” në “arrest shtëpie”. Edhe Florian Domi u lirua nga qelia në këmbim të garancisë pasurore në vlerën e 6 milion lekëve. Ndërsa Flogert Mezhika u la në qeli në masën “arrest në burg”. Në kërkim mbetet Ervis Lami që prej rreth një viti ka një tjetër masë arresti në mungesë për disa armë që iu gjetën në banesë. Policia njoftoi se arsyeja e vendosjes së lëndës eksplozive që shkaktoi dëme të konsiderueshme në biznes është një gjobëvënie prej 500 000 eurosh, që autorët i kishin vendosur pronarit të godinës Saimir Sina, ndërsa ky i fundit kishte refuzuar që t’ia jepte. Një nga personat që u la i lirë këtë të mërkurë, Jeton Lami, është liruar nga burgu në shtator të vitit 2023, i dënuar për ‘shpërdorim detyre’ teksa dyshohet se ka shoqëruar me makinë të Ervis Martinaj, para se ky i fundit të zhdukej në gusht të vitit 2022. Policia po vijon punën për kapjen e Ervis Lamit dhe për identifikimin e personave të tjerë të mundshëm të përfshirë në këtë ngjarje.