Policia e Dibrës ka njoftuar një aksion kundër tregëtimit të lëndës plasëse, por edhe shfrytëzimit të paligjshëm të minierave. Drejtori I Policisë Dibër, Dhimitraq Ziu deklaroi në një konferencë për shtyp se janë 6 persona të arrestuar të përfshirë në këto aktivitete. Në total policia ka sekuestruar 1 ton e 162kg lëndë shpërthyese dhe 815 kapsolla elektrike, që u kapën në disa subjekte me pronarë apo administrator shtetasit e arrestuar. Dy nga këta shtetas janë vëllezër banues në Krastë të Bulqizës, Brolind Kotja 25 vjeç dhe Drilon Kotja 21 vjeç, ky I fundit person me precedent të mëparshëm kriminal, i dënuar për armëmbajtje pa leje. Ata akuzohen se shfrytëzonin në mënyrë të paligjshme një miniere në Batër të Krastës, ku policia gjithashtu sekuestroi 20 kallëpe me lëndë plasëse dinamit (me peshë 8 kg) dhe 15 kapsolla elektrike. Në pranga ra edhe shtetasi Hajdar Bala 38 vjeç, punonjës në galerinë e përvetësuar nga dy vëllezërit.