Një konflikt mes dy shtetasve turq në zonën e Saukut, në Tiranë, ka përfunduar me përdorimin e armës së zjarrit dhe plagosjen e njërit prej tyre. Ngjarja ka ndodhur mbrëmjen e së hënës në ambientet e një lokali, ku pas një sherri mes dy personave situata ka precipituar deri në nxjerrjen e pistoletës. Si pasojë e të shtënave ka mbetur i plagosur shtetasi Halil Uçar 39 vjeç, i cili ka marrë një plagë në shpatull. I plagosuri është transportuar rreth orës 19.25 menjëherë për ndihmë mjekësore dhe mësohet se po merr trajtim të specializuar në një spital privat. Nga të dhënat paraprake, ai ndodhet jashtë rrezikut për jetën. Ndërkohë, policia ka nisur hetimet për zbardhjen e plotë të rrethanave të ngjarjes dhe për identifikimin e kapjen e autorit, i cili dyshohet se është larguar nga vendi i ngjarjes pas incidentit. Grupi hetimor po punon për të sqaruar shkaqet që çuan në përshkallëzimin e konfliktit.