Gazetari i njohur italian Sigfrido Ranucci, drejtues i emisionit investigativ “Report” është përballur me një sulm një natë më parë. Makina e tij dhe ajo e vajzës së gazetarit, janë përfshirë nga flakët pas një shpërthimi të fuqishëm. Sulmi ndodhi rreth orës 22:00 dhe nga shpërthimi u dëmtua edhe makina tjetër e familjes, e cila zakonisht përdorej nga vajza. Lajmin e ka konfirmuar vetë Ranucci përmes një postimi në rrjetet sociale. “Dy eksplozivë kanë shkatërruar automjetet e parkuara para shtëpisë sime në Campo Ascolano, në periferi të Romës. Shpërthimet ishin aq të forta sa tronditën të gjithë lagjen”, shkroi gazetari. Fatmirësisht, nga ngjarja nuk ka pasur të lënduar, por dëmet materiale janë të konsiderueshme. Në vendngjarje kanë mbërritur menjëherë forcat e karabinierisë, njësia kundër terrorizmit dhe krimit të organizuar si dhe zjarrfikësit. Sipas gazetarit sulmi nuk mund të jetë rastësi, pasi disa ditë më parë kishte shpallur temat e hetimeve të reja të Report. Gjatë sezonit të kaluar të emisionit gazetari ka realizuar investigime edhe për Shqipërinë dhe grupet kriminale shqiptare.