Hetuesit francezë dyshojnë se sabotimi mund të ketë shkaktuar daljen nga shinat të një treni në veriperëndim të Francës, ku u plagosën 44 persona. Prokurorët deklaruan të shtunën se në shina u gjet një pjesë e madhe metali, duke ngritur dyshime për një akt të qëllimshëm. Pjesa e shinës peshonte rreth 250–300 kilogramë dhe mundësia e një veprimi keqdashës po trajtohet si pista kryesore e hetimit. Treni, me 186 pasagjerë, po udhëtonte nga Rouen drejt Caen, kur doli nga shinat rreth orës 19:45 të së premtes, pranë fabrikës së Renault në qytetin Cleon. Një vagon u përmbys, ndërsa katër të tjerë dolën nga shinat. Presidenti i rajonit të Normandisë, Hervé Morin, tha se skenari më i mundshëm është që të ketë ndodhur një akt kriminal, dhe jo thjesht një veprim i pakujdesshëm. Ai theksoi se një pjesë kaq e madhe e shinës nuk mund të kishte përfunduar rastësisht në shina, pasi një tren kishte kaluar aty vetëm një orë më parë dhe nuk ishin kryer punime mirëmbajtjeje. Testet e drejtuesit të trenit për alkool dhe drogë rezultuan negative. Në vendngjarje u aktivizua plani për raste me shumë viktima, me 130 zjarrfikës, pesë ekipe mjekësore dhe 80 automjete. Nga aksidenti u plagosën 44 persona, mes tyre një vajzë 18-vjeçare që fillimisht ishte në gjendje kritike. Të shtunën gjendja e saj nuk konsiderohej më kërcënuese për jetën, por ajo mbeti e shtruar në spital.