Dhjetëra persona janë lënduar si pasojë e përplasjes mes dy trenave kokë më kokë pranë kryeqytetit danez, Kopenhagen, të enjten. Mediat vendase raportuan se 17 persona u lënduan, katër prej tyre në gjendje të rëndë, pas përplasjes së trenave në Gribskov, rreth 40 kilometra në veri të Kopenhagenit. Policia e quajti përplasjen një “aksident serioz”, por një zëdhënës i policisë i tha AFP-së se të gjithë udhëtarët u evakuuar nga trenat. “Dy trena u përplasën dhe policia dhe shërbimet e emergjencave janë mbledhur atje”, tha policia në një deklaratë. Rasti u regjistrua në orën 6:30 të mëngjesit, sipas zëdhënësit të policisë, Tim Simonsen. “Ishte një përplasje kokë më kokë dhe ka të lënduar mes udhëtarëve”, tha ai për AFP, pa dhënë hollësi të mëtejshme. Kryetarja e bashkisë së Gribskovit, Trine Egetved, tha në Facebook se disa nga të lënduarit u dërguan në spital me helikopter. Pamjet në media treguan dëmtime në lokomotivat e dy trenave, që ndodheshin mes qyteteve Hillerod dhe Kagerup kur u përplasën me njëri tjetrin. Egetved tha se është “thellësisht e tronditur dhe e shqetësuar” nga aksidenti. “Ky tren përdoret nga shumë banorë të Gribskovit, punëtorë dhe studentë. Shërbimet e emergjencave po punojnë pa pushim dhe ne po përpiqemi, në nivel qendror, të krijojmë një pasqyrë të qartë të asaj që ndodhi dhe të sigurohemi që të gjithë të marrin ndihmën që u nevojitet”, tha ajo. Danimarka krenohet me standardet e saj të larta të sigurisë, por një aksident treni në vitin 2019 la tetë persona të vdekur dhe 16 të tjerë të lënduar.