Tregu famëkeq i kafshëve në Vuhan të Kinës, ka qenë epiqendra e pandemisë së koronavirusit, sipas dy studimeve të reja që janë publikuar në revistën shkencore, Science. Duke iu përgjigjur pyetjes nëse sëmundja është bartur në mënyrë natyrale nga kafshët te njerëzit, apo ka qenë rezultat i një aksidenti në laborator, ky konstatim i ri konsiderohet shumë i rëndësishëm për shmangie të pandemisë së radhës dhe ruajtjes së miliona jetëve. Në studimin e parë është analizuar përhapja gjeografike e rasteve në dhjetor 2019, duke treguar se të infektuarit e parë janë të lidhur me tregun e kafshëve në Vuhan. Në studimin e dytë janë analizuar të dhënat e evoluimit të virusit, duke dalë në përfundim se koronavirusi nuk ka qarkulluar në masë të madhe mes njerëzve para nëntorit të vitit 2019.Ndonëse edhe studimet e kaluara kanë përkrahur më shumë teorinë daljes së virusit nga tregu i Kafshëve në Vuhan, shkencëtarët kanë qenë në kërkim të të dhënave të tjera për të vërtetuar origjinën. Koronavirusi u raportua për të parën herë në dhjetor 2019 në Vuhan të Kinës. OBSH e shpalli atë pandemi më 11 mars 2020 dhe deri më tani, më shumë se 6 milionë njerëz në të gjithë botën kanë humbur jetën nga ky virus.