Blutë e Lezhës kanë zbardhur dinamikën e vjedhjes në banesën e një të moshuari në fshatin Gajush, të ndodhur më 28 prill. Policia njofton se operacioni, nisi menjëherë pas telefonatës për vjedhje me dhunë, në banesën e 66-vjeçarit. Falë operacionit u kapën dhe u vunë në pranga shtetasit me iniciale K. N. 22 vjeç, banues në Mirditë (me precedent penal), 21-vjeçari me iniciale A. S. banues në Korçë dhe L. Ll., 22 vjeç, banues në Tiranë. Ky i fundit u vu në pranga në tentativë për të ikur nga Shqipëria, nëpërmjet PKK Muriqan. Nga hetimet dyshohet se 3 shtetasit janë implikuar në vjedhjen me dhunë të 1500 dollarëve, 880 eurove, 50 000 lekëve dhe 1 arme gjahu, në banesën e një 66-vjeçari, kryer në orët e para të mëngjesit të datës 28 prill. Po ashtu është proceduar penalisht babai i njërit prej të arrestuarve, për përkrahje të autorëve.