Operacioni Forca e Ligjit i ka dërguar të premten kërkesën për deklarimin e pasurive 3 të fortëve të Korçës, të cilët janë dënuar për vrasje, vjedhje me armë, dhe prodhim dhe shitje të lëndëve narkotike. Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, Juxhin Kullës, i dënuar për veprat penale “Prodhimi dhe shitja e narkotikëve” dhe “Trafikimi i narkotikëve”, kryer në bashkëpunim, mbetur në tentativë; Vasfi Bedullës i dënuar për veprën penale “Vrasje për shkak të marrëdhënieve familjare”; Teodor Grazhdani i dënuar për veprën penale “Vjedhje me armë”, e kryer në bashkëpunim. Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme. OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.