Shtetet anëtare ende nuk i kanë dhënë dritën jeshile unanimisht Shqipërisë për raportin e piketave të ndërmjetme të njohur si IBAR. Një burim në Këshillin Europian shpjegoi për Top News se janë disa shtete që ende nuk po bien dakord që çështja e Shqipërisë të kalojë në nivelin tjetër vendimmarrës, grupin e ambasadorëve, për t’i hapur rrugën mbajtjes së konferencës ndërqeveritare. “Takimi i COELA-s nuk ishte përfundimtar në kuptimin që disa delegacione ende po shqyrtonin draftin e EUCP-së dhe nuk mundën të jepnin dritën jeshile për hapat e mëtejshëm. Grupi i Punës do t'i rikthehet dosjes të enjten me qëllim arritjen e një marrëveshjeje. Dosja, shpresojmë, t'i kalojë COEREPER-it, me shumë mundësi të premten pasdite.” Pavarësisht se ende nuk është arritur dakordësia e plotë, me të paktën tre shtete që ende shfaqen skeptike, burimi i Top News në Këshillin Europian shfaqet optimist për ecurinë e çështjes së Shqipërisë në grupin e punës Coela.