Udhëtarët që kalojnë nëpër disa aeroporte evropiane thuhet se po presin deri në tre orë në kontrollet kufitare për shkak të sistemit të ri të hyrje-daljeve të BE-së. Pasagjerët në aeroportet e vendeve si Franca, Gjermania, Belgjika, Italia, Spanja dhe Greqia po presin disa orë në kontrollet kufitare, tha organi i Këshillit Ndërkombëtar të Aeroporteve. Olivier Jankovec, drejtori i divizionit evropian të këshillit, i tha Financial Times: "Kjo situatë, në javët e ardhshme dhe sigurisht gjatë muajve të verës, kur edhe shënohet piku i udhëtimeve, do të jetë thjesht e papërballueshme. Po i shohim ato kohë pritjeje tani, po në orët e pikut, cfarë do të ndodhë?" Sistemi i ri hyri në fuqi të premten në vendet e Shengenit - 25 nga 27 shtetet e BE-së plus Islanda, Lihtenshtajni, Norvegjia dhe Zvicra. Ai kërkon që pasagjerët nga vendet jo-anëtare të BE-së të regjistrojnë informacionin e tyre personal dhe biometrikën në kufi. Sistemi është futur gradualisht që nga tetori dhe ka shkaktuar vonesa të gjata në disa aeroporte. Të dielën, BBC raportoi se më shumë se 100 pasagjerë nuk ishin në gjendje të hipnin në një fluturim të easyJet nga Milano në Mançester para se të nisej për shkak të vonesave në sportelet e pasaportave. Përfaqësuesit e aeroportit dhe Komisioni Evropian zhvilluan një takim për të diskutuar problemet me sistemin. Këshilli ndërkombëtar i Aeroporteve thuhet se ka kërkuar të zgjasë përjashtimet ekzistuese si edhe pezullimin e plotë të kontrolleve të reja. Komisioni evropian tha se sistemi po funksionon mirë dhe në shumicën e vendeve anëtare nuk ka probleme. Komisioni tha se koha mesatare për regjistrimin e një pasagjeri është 70 sekonda, megjithëse Këshilli ndërkombëtar i aeroporteve ka pohuar se mund të zgjasë deri në pesë minuta.